Najeriya da Birtaniya sun kulla yarjejeniya ta dala miliyan 496 don bunkasa kiwon shanu da samar da madara.

Hukumar Zuba Jari ta Kasa ta Najeriya (NSIA) ta sanya hannu kan wata yarjejeniyar fahimtar juna da kamfanin Asset Green Ltd na ƙasar Birtaniya domin bunƙasa wani babban shirin kiwon shanu da sarrafa madara. 

An rattaba hannu kan yarjejeniyar a birnin Landan gabanin ziyarar aiki ta Shugaba Bola Tinubu, inda aka fayyace yadda haɗin gwiwar zai kasance da kuma shirye-shiryen kashe kuɗaɗen fara aikin.

Wannan shiri ana kallonsa a matsayin ɗaya daga cikin manyan ayyukan zuba jari a harkar madara da aka taɓa yi a Najeriya. Aikin zai haɗa da hekta 20,000 na noma mai amfani da dabarun zamani masu kula da yanayi, tare da kiwon shanu 10,000 masu bayar da madara da kuma gina babbar masana’antar sarrafa kayayyakin madara na zamani.

Masana’antar za ta rika samar da madara sabuwa, madarar foda, man shanu, kirim, da kuma tan 15,000 na abincin jarirai a duk shekara. An tsara wannan aiki ne domin rage dogaro da Najeriya ke yi kan shigo da madara daga ƙasashen waje, tare da inganta hanyoyin noma da kuma haɗa gidaje na karkara har 10,000 cikin tsarin samar da kayayyaki.

Ana sa ran idan aikin ya fara aiki, zai rika samar da sama da dala miliyan 620 a duk shekara. Haka kuma, zai samar da ayyukan yi kai tsaye 2,500 da wasu 5,000 ba kai tsaye ba, wanda zai taimaka wajen bunƙasa tattalin arziki da ƙarfafa tsaron abinci a ƙasar.

Jami’ai daga ɓangarorin biyu sun bayyana cewa wannan haɗin gwiwa wata muhimmiyar hanya ce ta bunƙasa harkar noma da samar da abinci a Najeriya. Sun ce aikin zai rage shigo da kayayyakin madara daga waje, ya ƙara samar da ayyukan yi, tare da gina masana’antar madara mai ɗorewa wadda za ta amfani ‘yan Najeriya na dogon lokaci.